10:00Әрі қарай: «Елбасы. Тәуелсіздік жылнамасы» деректі фильмі
+7 (7172) 757 540
astananews@khabar.kz

Оралда жаңадан бой көтерген көпқабатты тұрғын үйлер қайта сүрілуі мүмкін

  • Категория: Қоғам
Оралда жаңадан бой көтерген көпқабатты тұрғын үйлер қайта сүрілуі мүмкін

Қоныс тойын тойлауға дайындалып отырған үлескерлер аяқасты дау-дамаймен әлек болды.

Үш ғимарат өндіріс орнының санитарлық аймағына салынған болып шықты. Сот құрылысқа рұқсат берген қала әкімдігі құжаттарының күшін жою туралы шешім шығарды. Алайда құрылыс компаниясы мен жергілікті атқарушы орган бұл шешіммен келіспейді.

Ләззат Намазова жаңа баспана алу үшін былтыр аядай пәтерін сатып жіберген. Кейін үлескер ретінде салынып жатқан көпқабатты тұрғын үй жобасына қатысты. Қаражатты құрылыс компаниясына алдын ала толық төлеп тастапты. Ал құрылыс аяқталғанға дейін олар жалдамалы пәтерде тұрып келген. Биыл көктемде көптен күткен баспананы кілтін алып, қосымша қаражатқа жөндеу жұмыстарын жүргізді. Жаңадан қоныстанғаннан кейін ғимараттың заңсыз салынғанын естіді. Жайсыз жаңалық тұтас отбасыны уайымға батырып, шарасыз күйге түсірді.

Ләззат Намазова, қала тұрғыны:

- 5 ай болды ұйқымыз ұйқы емес, ішкен тамағымыз тамақ емес. Әрине, жүйкеге тиеді. Үйден береке кетеді. Үміттімін. Үйсіз жүрген адам қаншама. Ал мынау салынып тұрған үйді қалай бұзады, білмеймін. Ақылға сыймайтын нәрсе.

Жоспар бойынша биыл дәл осы аумақта 4 бірдей бесқабатты тұрғын үй кешені тапсырылуы керек болатын. Ғимараттардың біреуі толық аяқталып, отбасылар көшіп те келді. Ал қалған үшеуіне қатысты жер дауы туындап отыр. Қос нысанның құрылысы тіптен аяқсыз қалды. Кәсіпорындар арасындағы келеңсіздік салдарынан қарапайым 400-ге жуық отбасы зардап шегіп отыр. Екі нар тірессе, ортада қара шыбын өледінің кебі келіп тұр.

Шаттық Слемғали, қала тұрғыны:

- Негізі біз бұл үйге шілдеде кіруіміз керек еді. Бірақ біз әлі қолымызға құжат та, ештеңе де алған жоқпыз. Біз осыған дейін екі баламен 70 мыңға үй жалдап тұрдық. Сосын мамыр айында хабарласып едік: «Кілтті ала берсеңіздер болады, бірақ құжат әлі дайын болмайды», – деді. Сондықтан біз жалдамалы үйден шығып, осы жаққа көшіп кеттік.

Белгілі заңгер Бақытжан Базарбек шағымданушы тараптың сотта әділ жеңіп шыққанын мәлімдеді. Бұл туралы Фейсбук парақшасында жариялап, санитарлық аймақта орналасқан 3 тұрғын үй кешеніне қатысты қала әкімдігі құжаттарының күші жойылғанын жазды. Ал құрылыс компаниясының өкілдері сот шешімімен келіспей отыр.

Махамбет Батырғалиев, құрылыс компаниясының өкілі:

- Ет өндірісі кәсіпорнының санитарлық аймағының көлемі құжаттарда ресми көрсетілмеген. Оны қала әкімдігі бекітуі керек. Екіншіден, министрліктердің келісімімен және Үкіметтің Қаулысымен нақтыланған қаланың Бас жоспарына сүйенсек, құрылыс нысандары санитарлық аймаққа кіріп тұрған жоқ. Біздің жоба сарапшылардың оң қорытындысын алып қойған. Ғимаратты бұзу туралы соттың шешімі шыққан жоқ. Сондықтан біз өз құқығымызды қорғап, кикілжіңді шеше аламыз деп үміттенемін.

Әкімдіктегілер де дәл осындай пікірде. Санитарлық аймақтың нақты көлеміне қатысты жергілікті атқарушы органның Қаулысы жоқ көрінеді.

Асхат Құлбаев, қала әкімінің орынбасары:

- Ет өндірісі кәсіпорнын салу кезінде 100 - 299 метр аралығында санитарлық аймағының көлемі нақтыланады. Ал ол қала әкімдігінің Қаулысы негізінде бекітілуі қажет. Ондай құжат рәсімделмеген. Қала сәулетшісі уәкілетті органның өкілі ретінде барлық құжаттарды түгел тексеру тиіс еді. Мұндай өрескел қателік жіберген маман қызметінен босатылды.

Мәселені қос тарапқа тиімді етіп шешуге саяси ұйым да күш салып көрді. Олар медиациялық жолмен оңтайландыруды ұсынған еді. Алайда шағымданушы тарап ешқандай келіссөз жүргізілмейтінін дөп басып айтқан.

Кенесары Нұршинов, «Nur Otan» партиясы БҚО филиалы төрағасының орынбасары:

- Заң бар. Соттың шешімі бар. Біз бұдан ешқайда қашып кете алмаймыз. Біздің партия, қолымыздан келгеннің барлығын жасадық. Айтып отырмын, 5 жиын өтті. Өзіміз сол Циалковский тұрғындарының үйлеріне де барып кездестік. Енді еш нәтижесін бермей отыр.

Құрылысқа қатысты кей құжаттардың күші жойылғанымен, көпқабатты тұрғын үйлерді бұзу туралы сот шешімі әлі шыққан жоқ. Даулы мәселе ұзаққа созылуы мүмкін. Ал баспана алуды талай жылдан бері армандап келген жүздеген отбасы енді қайда барарын білмей дал. Олар өз қаражатына салынған үйлерді бұздыруға мемлекет жол бермейді деген үмітте.

Авторлары: Еркебұлан Смадияров, Болат Жарылғасов

Сондай-ақ...