18:00Эфирде: Новости. Итоги дня
19:00Әрі қарай: Қорытынды жаңалықтар. Біздің мақсат
+7 (7172) 757 555
sale@khabar.kz

Түркістан облысының Сайрам ауданындағы ерекше бау-бақша

  • Категория: Қоғам
Түркістан облысының Сайрам ауданындағы ерекше бау-бақша

Түркістан облысының Сайрам ауданында ерекше бау-бақша бар. 2,5 гектар аумаққа бес түрлі алма сорты егілген.

Бір қызығы, арасындағы кейбір ағаштарда алманың 4-5 түрі қатар жеміс береді екен.

Икрам Розақұлов - Қарабұлақ ауылдық округіндегі бау өсірумен айналысатын ең кәнігі бағбан. Ауласындағы 2,5 гектар аумаққа осыдан 15 жыл бұрын 700 түп алма көшетін Өзбекстаннан әкеліп отырғызған. Қазір мұнда 5 түрлі алма сорты жайқалып тұр. Бұдан бөлек бағбан бір түп ағашқа бірнеше түрлі алма өсірумен де айналысады. Қазір жаз ортасынан ауып кеткендіктен кейбір алма сорттары пісіп, түсіп қалған.


Икрам Розақұлов, бағбан: 
Бір түп ағашқа он түп істеуге болады. Он түрлі алма өседі. Тіпті алма ағашына груша өсіруге болады. Бірақ грушаға өзінен басқасы өспейді. Тек грушаны алады. Ал алма грушаны ала береді. Бір түпке он түрлі сорт істеп қоюға болады. Ештеңесі жоқ, бәрі өсе береді. Кезек-кезегімен пісіп, біте береді.

Бағбанның айтуынша, мұндай тәжірибені тамыз айының басынан қыркүйектің ортасына дейін жасауға болады. Алдымен кез келген жемістің кішкентай бұтағын кесіп алу керек. Оны алма бұтағының қабы аршылған жеріне мықтап бекітеді. Ішіне ауа кірмеуі керек. Келесі жылы көктемде алма ағашының басқа бұтақтары сияқты ол да бүр жарып, өсе береді. Мамандар мұндай әдісті аудандағы бірнеше дихан өз бауында қолданатынын айтады. Жалпы Қарабұлақ ауылында бағбандықпен айналысатындар өте көп.


Әбдішүкір Әділахат, Қазақбұлақ ауылдық округінің әкімі:
Қарабұлақ ауылында 35-40 гектардай алма бауы бар. Жеміс беретін. Ал әлі жеміс бермейтіндері бар. Олар әлі тізімге кірген жоқ. Жаңадан егіп жатқандар бар.

Бау өсіріп, бағбандықпен айналысатындар биыл жеміс жылдағыдан 15-20 күнге ерте пісіп жатқанын айтады. Сондықтан бағасы да арзан. Қазір алушылар баудың басына келіп, алманың әр келісін 150-200 теңгеден сатып алады. Биыл Сайрам ауданының бағбандары жыл соңына дейін 30 мың тоннаға жуық алма алуды жоспарлап отыр.

Авторлары: Жандос Жұмабек, Ерболат Әбіш, Қуаныш Әбуов.

 

Сондай-ақ...