05:02Эфирде: Телесериал «Братство десанта»
07:00Әрі қарай: «Самопознание»
+7 (7172) 757 540
astananews@khabar.kz

Елордадағы инфекциялық стационарлардың 70% науқасқа толы

  • Категория: Қоғам
Елордадағы инфекциялық стационарлардың 70% науқасқа толы

Коронавирус ырыққа көнбей барады. Елде жаппай вакциналау жұмыстары жүргізіліп, шектеу шаралары қолға алынғанмен нәтиже аз.

Үлкендермен қатар балалар да ауырып жатыр. Осыған байланысты Денсаулық сақтау министрі Алексей Цой журналистердің сұрақтарына жауап беріп, түйткілді мәселелерді айтты.

Жыл басынан бері елде үлкендер тұрмақ, 34 мың бала вирус жұқтырған. Оның екеуі қайтыс болды. Қазір 550 бала ауруханада жатыр. 13-і жаңа туған шақалақ. Ал 4 бала ауыр халде реанимацияда ем алуда. Олар – Ақмола, Нұр-сұлтан, Қызылорда, Жамбыл облысының тумалары.

Ажар Ғиният, ҚР Денсаулық сақтау вице-министрі:

- Бүгінде елордада эпидемиологиялық ахуал өте күрделі. Инфекциялық стационарлар 70% толық, ал реанимацияда 78% науқастар жатыр.

Елде барлығы 2 млн бала бар. Енді 12 жастан асқан жасөспірімдерге ата-анасы келіссе екпе салынады. Денсаулық министрі мәжбүрлеу болмайды деп уәде етті. Вакциналау елге Pfizer екпесі жеткізілген соң басталады. Себебі балаларға салынатыны тек осы вакцина. Бұл өнімнің Қазақстанға жеткізілуі жөнінде 4 айдан бері келіссөз жүргізіліп жатыр.

Алексей Цой, ҚР Денсаулық сақтау министрі:

- Ата-аналар баласына екпе салғызуға ниетті. Бірақ елде оған вакцина жоқ. Pfizer жеткізілген уақытта балаларға салуға басымдық беріледі.

Елдің бас дәрігері халықты қолда бар екпемен вакцина қабылдауға шақырды. Өйткені ауруханада ауыр халде жатқандардың барлығы – вакцина алмағандар.

Алексей Цой, ҚР Денсаулық сақтау министрі:

- Қазір бар вакцинаны қабылдауға шақырамын. Күн сайын вирус жұқтырғандар көбейіп жатыр. Ауыр халде жатқандардың көбі – вакцина қабылдамағандар. Елде жоқ екпені күтпеңіздер!

Қазір ел бойынша 2000-ға жуық вакциналау пункті бар. 5 млн 54 мың 970 адам екпенің бірінші компонентін қабылдаса, екінші компонентін 4 млн-ға жуық қазақстандық салдырған. Ал ревакцинация, яғни 6 айдан соң екпені қайта қабылдау әзірге қарастырылмайтынын Цой атап өтті.

Авторы: Гүлзия Нақыпқызы.

Сондай-ақ...